Azərbaycanda sığorta üzərində nəzarət gücləndirilir
Cari ilin əvvəlindən Maliyyə Nazirliyi yanında Dövlət Sığorta Nəzarəti Xidməti sığorta şirkətlərindən hesabatları “Sığorta nəzarəti sistemi” proqram təminatı vasitəsilə əldə edir.
Bu barədə Dövlət Sığorta Nəzarəti Xidmətinin mətbuat xidmətinin yaydığı məlumatda bildirilir.
Qeyd edək ki, “Sığorta nəzarəti sistemi” proqram təminatı “Elektron hökumət” layihəsi çərçivəsində 2010-cu ildə hazırlanıb və Dövlət Sığorta Nəzarəti Xidmətində sınağı keçirilib. Bu proqramın məqsədi sığorta üzərində dövlət nəzarəti sisteminin beynəlxalq standartlara uyğunlaşdırılması, onun keyfiyyətinin yüksəldilməsi, hesabatların təqdim edilməsi və baxılması proseslərində şəffaflığın təmin edilməsidir.
Hazırda “Sığorta nəzarəti sistemi” proqram təminatının təkmilləşdirilməsi yönündə işlər aparılır.
